S.E Abrao Saldanha Vizita Centru Juventude Ermera

S.E Eng. Abrão Nokosiku Saldanha observa direta atividade formasaun iha centru juventude Ermera, Gleno (04/03/2021) . Imajen/DNICT

ERMERA- Sekretáriu Estadu Juventude no Desportu (SEJD), Eng. Abrão Nokosiku Saldanha iha loron-04 fulan-Marsu tinan-2021 ne’e halao viajen ba munisipiu Ermera hodi partisipa expozisaun juvenil iha setor produtivu ne’ebé Alumni Parlamentu Foinsa’e Timor Leste (APFTL) no Oxfam realiza. Iha viajen ne’e Sekretariu Estadu aproveita mós oportunidade hodi vizita no observa direita kondisaun no aktividade ne’ebé mak sentru juventude Ermera hala’o.

Abrão Saldanha hatete, guvernu atraves SEJD sei prioritiza ba maximizasaun centru sira hodi garante katak centru ida la’os iha fatin deit, maibé mós centru ida ho programa barak nune’e bele hala’o aktividade barak, fo kobertura barak liu tan ba joven sira no fo fatin ba joven sira atu bele expresa sira nia talentu no kapasidade.

Durante vizita ba centru juventude, Sekretáriu Estadu husu ba foinsa’e sira ne’ebé tuir formasaun iha centru refere tenke tuir metodu ne’ebé mak fasilitador sira fo, tamba centru ne’e hanesan fatin ida ba joven sira atu expresa talentu kreatividade nian. Pontu Fokal SEJD nian iha Ermera Marcelino Maia de Deus informa Centru juventude Ermera koopera tebes ho centru juventude sira atu bele finaliza aktividade SEJD nian iha munisipiu.

Centru juventude Ermera durante ne’e fó formasaun ba joven sira liu husi edukasaun non formal hanesan; kursu lian Ingles basika, komputador, no mós formasaun kona-ba Kompetensia ba vida ka Life Skills-Based Education (LSBE).

 

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2021

---