SEJD Elojia Expozisaun Juvenil iha Setor Produtivu

By Media DNICT 05 Marsu 2021, 13:05:32 TLs JUVENTUDE
SEJD Elojia  Expozisaun Juvenil iha Setor Produtivu

S.E Eng. Abrão Nokosiku Saldanha koalia hela kona-ba estimulu joven sira iha area produtivu emprendedorismo sosial iha expozisaun Juvenil iha setor produtivu ne’be realiza iha salaun Parokia Nosa Senhora da Graça Gleno (04/03/2021) . Imajen/DNICT


ERMERA- Sekretáriu Estado Juventude no Desportu (SEJD), Abrão Nokosiku Saldanha partisipa expozisaun juvenil iha setor produtivu kinta feira ne’e iha salaun Parokia Nosa Senhora da Graça Gleno,Ermera. Prezensa Excellensia nian iha expozisaun ne’e hodi koalia kona-ba kreatividade joven sira nian atu bele kria kampu servisu ba a’an rasik. Sekretariu estadu agradese ba Alumni Parlamentu Foinsa’e Timor Leste (APFTL) no OXFAM ne’ebe kria espasu ba joven sira bele dada lia ho guvernante sira atu buka dalan ba sira atu kria sira nia moris,”eventu hanesan ne’e mós fo oportunidade ba investors sira ou kompradores sira atu nune’e bele hare inisiativa joven sira nian hodi bele hasa’e no dezemvolve sira nia moris rasik”, dehan sekretáriu estadu Abrão Saldanha.

Guvernante ne’e hatete husi expozisaun refere hatudu ona prova katak joven barak iha potensia, joven sira bele halo, bainhira politiku ou guvernu bele kria kondisoes no espasu. “joven sira, saida mak SEJD atu halo? baze ba referensia sira mak estimulu joven sira iha area produtivu emprendedorismo sosial, sei hahu no atu espanda hanesan agora dadaun iha ita nia oin ne’e, prefere ba 126 sukus, atu oinsa estimula joven sira atu fila kampu.”tenik guvernante ne’e.

Abrão Nokosiku Saldanha hatete oportunidade servisu hanesan agrikultura, pekuaria, peskas, turismo no mos konservasaun ambiental ne’e bele hahu husi suku sira. Nudar Abrão Saldanha, joven barak mak eskola ho hanoin ida katak aban-bainrua ba hotu servisu iha kantor, hotu-hotu hakarak funsionariu publiku, ne’e la iha, servisu bele mai husi setor produtivu ne’ebé sei kria servisu ba ema ida-idak, ezemplu ida mak kafe organik Atsabe ne’ebé kria husi joven Ameta fo ona servisu ba nia maluk joven sira hamutuk 125 pesoas ho idade 28 anos no nia exporta kafé organik Atsabe ne’e ba nasaun Eropa inklui nasaun sira iha ocean pasifiku.

Tinan ida ne’e mos SEJD sei halo festival nasional ba joven kriadores, oinsa mak lori joven sira ne’e iha kapasidade no inovasaun atu lori sai para ema hotu hare no asiste, no hanoin ida mak fo premio ba joven sira, se lae publiku nia hanoin ba ita joven sira mak kria problema hela deit.

Expozisaun ne’ebé realiza iha kinta loron , 04 fulan marsu tinan 2021 ne’e partisipa mos membru guvernu relevante husi Ministerio Agricultura, Ministerio Turismo Comercio Industria, SeCoop, hodi koalia kona-ba kreatividade joven sira nian, ligadu ho setor agricultura, kredito, no setor turismo.

 

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2021




Hare Komentariu Hotu-Hotu

Hakerek Komentariu