SEJD Hari Posku Asaun Juventude Hodi Tulun Responde ba Situasaun Iha Dili Laran

By Media DNICT 20 Abril 2021, 14:25:53 TLs JUVENTUDE
SEJD Hari Posku Asaun Juventude Hodi Tulun Responde ba Situasaun Iha Dili Laran

Sekretáriu Estado Juventude no Desportu (SEJD) Eng. Abrão Nokosiku halo hela diskusaun ho dirijente no parseiru sira kona-ba estabelesimentu Posku Asaun Juventude (PAJ) iha Sala Reuniaun SEJD Lecidere Dili (06/04/2021). Imajen/DNICT


DILI- Sekretariu Estadu Juventude no Desportu, Excellencia Eng. Abrão Saldanha lidera sorumutu ida ho dirijente no parseiru sira SEJD nian hodi diskuti kona-ba oinsa atu involve joven sira iha serbisu ne’ebé atu hatan ba situasaun iha Dili laran hafoin kalamidade klímatika loron-4 fulan Abril liu ba.

Sorumutu Iha loron-6 fulan-Abril tinan-2021 ne’e konkorda no deside hodi harii posku asaun ida, ne’ebé ninia centru iha edifisiu SEJD, Lecidere Dili. Centru ida ne’e hanaran Posku Asaun Juventude (PAJ) ne’ebé mak halibur dirijente sira SEJD nian ho ninia parseiru sira; entidade no organizasaun juvenil iha Dili laran.

Tuir desizaun sorumutu nian, Posku Asaun Juventude koordena husi Diretor Jeral Juventude no Desportu, Sr. David Tomas de Deus ho vice-koordenador Sr. Zaulino Gomes da Silva husi APFTL no Sr. Cesario da Silva husi ADTL. Entidade no organizasaun sira ne’ebé hola parte iha PAJ mak: Joven Hadomi Natureza (JHN), Asosiasaun Parlamentu Foin-Sa’e Timor-Leste (APFTL), Uniaun Nasional Eskuteirus Timor-Leste (UNETL), Konsellu Nasional Juventude Timor-Leste (CNJTL), Cruz Vermella Timor-Leste (CVTL), Asosiasaun Defisiensia Timor-Leste (ADTL), Estudante Hadomi Natureza UNTL (ESHANA-UNTL) Comoro Child and Youth Center (CCYC) Aliansa Nasional Kontrolu Tabaku (ANCT) no Centru Juventude Becora.

Posku Asaun Juventude nia nia kna’ar mak halibur joven sira, husi entidade no organizasaun hirak ne’e no mós juventude sira seluk ne’ebé atu hala’o serbisu voluntariu iha Dili laran hodi fo tulun ne’ebé presiza liu husi; atividade limpeza iha fasilidade públiku sira, limpeza iha komunidade sira nia hela fatin ne’ebé mak presiza tulun, fo apoiu umanitaria, no hala’o animasaun ba labarik no joven sira ne’ebé afetadu husi kalamidade.

 

#FoinSaeMillennialForsaKriativa #DesportuIhaSosiedadeNoPrestasaun

@copyrigthDNICT-SEJD 2021




Hare Komentariu Hotu-Hotu

Hakerek Komentariu